Alumni Meeting on 06/10/2019 (Sunday) - Registration Form (Click Here) Facebook Twitter


புதுக்கோட்டை ஜெ.ஜெ. கலை அறிவியல் கல்லூரியில் (தன்னாட்சி), இளையோர் சுழற்சங்கம், நாட்டு நலப்பணித்திட்டம், புதுக்கோட்டை சாலை பாதுகாப்பு சங்கம் ஆகியன இணைந்து 13.08.2019 அன்று உடல் உறுப்புதான தினத்தை முன்னிட்டு சாலை விழிப்புணர்வு கருத்தரங்கம் நடத்தியது.
ஆகஸ்ட் 13, உடல் உறுப்புதான தினமாக பின்பற்றப்பட்டு வருகிறது. உடல் உறுப்புதானம் செய்வதில் இந்திய அளவில் தமிழகம் முதலிடத்தைப் பெற்றாலும், உடலுறுப்பைத் தானமாகப் பெறுவதற்குக் காத்திருப்போர் எண்ணிக்கையும் அதிகமாக இருப்பதால் அதனைக் குறைப்பது நம் கடமையாகும். இதனை, மாணாக்கர்களிடையே வலியுறுத்தும் வண்ணம் இக்கருத்தரங்கம் நடைபெற்றது. இதில் எமர்ஜென்சி கேர் ஸ்கில் பௌண்டேஷனின் நிறுவனரும், அவசர மருத்துவ சிகிச்சை நிபுணருமான Dr. அண்ணாமலை பெரியண்ணன் அவசர உதவி வழிமுறைகள் பற்றிய விழிப்புணர்வு செயல்முறை குறித்துப் பயிற்சி அளித்தார்.
அவர்தம் பயிற்சியில், சாலை விபத்துகள் மற்றும் அன்றாட செயல்முறைகளில் உயிருக்கு ஆபத்தான சூழ்நிலைகளைச் சந்திக்கின்றோம். இந்த நேரங்சகளில் நாம் எத்தகைய வழிமுறைகளைப் பின்பற்ற வேண்டும், பின்பற்றக் கூடாது என்பது குறித்துச் செயல்முறைகளுடன் உரிய பயிற்சிகளைச் செய்து காண்பித்தார். மேலும், விபத்துகளுக்கு உள்ளாகும் மனிதர்கள் உரிய முறையில் அவசர உதவிகள் செய்யப்படாமையினாலும், குறித்த நேரத்தில் மருத்துவமனைக்கு எடுத்துச்செல்லாமையுமே மரணம் அதிகரிக்க காரணமாகும். இதனைத் தவிர்ப்பதற்கு, உயிருக்கு ஆபத்தான நிலைகளில் இருப்பவருக்கு உதவிட வேண்டும் என்று நாம் அனைவரும் எண்ணுவது இயல்பு. ஆனால் அந்த உதவியை முறையாக தெரிந்துகொண்டு செய்ய வேண்டியது அவசியமாகும். நாய்க்கடி, பாம்புக்கடி, மின்சார விபத்து, தீக்காயங்கள் போன்றன ஏற்படும்பொழுது, நாம் காலகாலமாய்ப் பின்பற்றும் செயல்முறைகளைச் செய்துவருகிறோம். இன்றைய கண்டுபிடிப்புகளின் அடிப்படையில் பல புதிய செயல்முறைளை அறிவுறுத்தப்படுகின்றன. அவற்றை நீங்கள் தெரிந்து செயல்படவேண்டும். சாலை விபத்துகளின்போது 108-க்கு தகவல் தெரிவிக்கும்பொழுது, விபத்து எந்த விதமானது? விபத்து இடம் எது? விபத்தில் பாதிக்கப்பட்டுள்ளோர் எத்தனை பேர்? தகவல் தெரிவிப்பவர் யார்? போன்ற தகவல்களை எவ்வித பதட்டமின்றித் தெரிவிக்க வேண்டும் என்று கருத்துரையில் கூறினார். தொடர்ந்து மாணவர்கள் எழுப்பிய வினாக்களுக்கு விரிவான விளக்கம் அளித்தார்.
சாலை பாதுகாப்பு சங்கத்தின் தலைவர் மாருதி கண.மோகன்ராஜ் நிகழ்ச்சிக்கு வாழ்த்துரை வழங்கும்பொழுது, சாலைகளில் விபத்துகளுக்குப் பெரும்காரணம் இளைஞர்களும், அவர்கள் பயன்படுத்தும் செல்போன்களுமே ஆகும். அதனால், இறப்பில், இளைஞர்களின் எண்ணிக்கை அதிகமாக உள்ளன. இளைஞர்கள் இதனைக் கருத்தில்கொண்டு சாலை விதிகளைக் கட்டாயம் தெரிந்துகொள்வதோடு மட்டுமின்றி முறையாக பின்பற்றவேண்டும். அதனைப்போன்று தலைக்கவசத்தைத் தவிர்க்காது பயன்படுத்த வேண்டும் என்று குறிப்பிட்டார்.
நிகழ்ச்சிக்கு கல்லூரியின் இளையோர் சுழற்சங்க ஒருங்கிணைப்பாளர் கு.தயாநிதி தலைமை தாங்க, நாட்டு நலப்பணித்திட்ட அலுவலர் முனைவர் R.மணிமாறன் வரவேற்புரைக் கூறினார். நிறைவாக, திட்ட அலுவலர் Dr.C.முத்துக்குமார் நன்றியுரை கூறினார்.